» » Хатирчи тумани ҳокими Ғофир Қуватович Алиевнинг туман аҳолиси ва фаолларига мурожаати

Хатирчи тумани ҳокими Ғофир Қуватович Алиевнинг туман аҳолиси ва фаолларига мурожаати

Ассалому алайкум, қадрли юртдошлар, азиз хатирчиликлар!

Хатирчи ўзининг бетакрор табиати,  тоғу даштлари, чашма вабулоқлари, дарё ва сойлари, жозибадор флора ва фаунаси билан асрлар давомида аждодларимизни доимо ўзига мафтун этиб келган.

Бугун Сиз қадрли хатирчиликларга, азиз тумандошларимга мурожаат қилиб яна бир бор таъкидлашни истардим:

- Она табиатимизнинг ҳар бир неъматини асраб авайлайлик, боридан унумли ва мақсадли фойдаланиб, фақат бугунги кунни эмас, эртамиз эгалари бўлган, жондан азиз фарзандларимизнинг ҳам ана шундай буюк неъматлардан бебаҳра бўлиб қолмасликлари учун масъул эканлигимизни унутмаслигимиз лозим!

Жорий йилнинг ўтган тўққиз ойи давомида фуқароларнинг ноқонуний ҳаракатлари оқибатида 324 та қонунбузилиш ҳолатлари аниқланиб, жисмоний шахсларга 109 миллон 940 минг сўмга яқин жарима қўлланилиб,табиатга етказилган зарар 99 миллион сўм ҳисобланганлиги афсуски, ачинарли ҳолдир.

Туманимизнинг ҳудудий жиҳатдан кенглиги, ов қилиш учун қулай ҳудуд бўлгани учун овчиларининг  сафи кенгайишига сабаб бўлмоқда. Аммо бу имкониятлардан нотўғри фойдаланиш, фауна ва флора оламига ваҳшийларча муносабатда бўлиш Ўзбекистон Республикасининг “Қизил китоби”га киритилган ўсимлик ва ҳайвонот дунёсига жиддий зарар етказиш афсуски, кузатилмоқда.

Азиз Хатирчиликлар!

Экология ва атроф-муҳитни муҳофаза қилиш давлатимиз ва ҳукуматимиз эътиборидаги устувор йўналишлардан биридир.

Ҳозирги вақтда миллий қонунчилигимизда атроф-муҳитни муҳофаза қилиш бўйича фаолиятни тартибга солувчи 30 дан ортиқ қонунлар ва 140 тадан ортиқ норматив-ҳуқуқий ҳужжатлар қабул қилингани бунинг яққол исботидир.

Шундай экан, бизнинг фаол депутатларимиз табиатимизга етказилган ҳар қандай зарар ва йўқотишларга кўриладиган жазо чораларини янада кучайтириш юзасидан ўзларининг асосли таклифларини ишлаб чиқадилар, деган умиддаман.

Қадрли тумандошлар!

Бир сўз билан айтганда, Яратганнинг бебаҳо инъоми бўлган муқаддас она табиатига зиён етказиш асло кечирилмас хатодир.

Шундай экан, туманимиз экологияси ва атроф-муҳитни муҳофаза қилишда туманимизнинг барча фуқароларини, давлат ва жамоатчилигимиз вакилларини барчани яқин ҳамкорликка, фаолликка чорлаб қоламан.

Эътиборингиз учун раҳмат!

Muallif:admin,  Qo‘shilgan sana: 24.11.2020,   Ko‘rilgan: 500   Chop etish
Siz maqolada xatoni uchratgan bo‘lsangiz, unda xato matnni belgilab, CTRL + ENTER tugmasini bosing va sayt ma'muriga xabarnoma jo‘nating.